c

पत्रकार दिलभूषण पाठकलाई पक्राउ नगर्न उच्च अदालत पाटनले अन्तरिम आदेश दिएको छ। पत्रकार पाठकविरुद्ध दर्ता भएको मुद्दामा सुनुवाइ गर्दै अदालतले उनलाई पक्राउ नगर्न सुरक्षा प्रदान गर्ने आदेश दिएको हो।

पाठकविरुद्ध सामाजिक सञ्जालमा अभिव्यक्त विचारका कारण उजुरी परेको थियो। उक्त उजुरीमा प्रहरीले अनुसन्धान अघि बढाइरहेका बेला पाठकले अदालतमा रिट दायर गरेका थिए। अदालतले प्रारम्भिक सुनुवाइपछि पक्राउ नगर्नू भन्ने आदेश दिएको हो।

उच्च अदालत पाटनका न्यायाधीशद्वयको इजलासले आदेश जारी गर्दै संविधानले प्रत्याभूत गरेको अभिव्यक्ति स्वतन्त्रताको हकको रक्षा गर्नुपर्ने उल्लेख गरेको छ। अदालतले विषयको थप अध्ययनका लागि दुबै पक्षलाई छलफलका लागि बोलाउँदै असार १० गतेसम्मका लागि अन्तरिम आदेश जारी गरेको हो।

पत्रकार महासंघ, मानव अधिकारकर्मी तथा विभिन्न सञ्चारकर्मीहरूले पाठकमाथिको संभावित कारबाहीप्रति विरोध जनाउँदै अभिव्यक्ति स्वतन्त्रतामाथिको आक्रमण नहोस् भन्ने माग गर्दै आएका छन्।